有個20幾歲嘅男病人，第一次見。佢話佢有家族遺傳俾佢嘅手指+腳趾痛風。佢唔肯戒口，唔肯抽血，唔肯見專科，淨係想攞消炎止痛藥。同佢講親痛風後遺症，佢都話佢知佢明佢識。
上個禮拜攞完藥，琴日又走去打邊爐食豬潤同飲酒。今日又痛到阿媽都唔認得。隻手指又腫，行步路又痛。咁你想點？
佢話每個月至少會痛兩、三次。佢覺得咁樣都仍然可以接受。比起戒口戒酒或者要食降尿酸藥會比較好。咁樣食消炎藥法，佢個胃好快穿窿喎～
我點樣苦口婆心勸佢都唔聽教。久唔久抽下血啫，去專科嗰度排定期啫。完全唔過分呀？！不過佢乜都唔制。咁無辦法。我同佢講，佢病發得咁密，10年之後啲關節開始提早退化，你到時先30幾歲。你攞嘢又攞唔到，筆又揸不到到，筷子夾餸又辛苦，每行一步路都痛到萬箭攢心。到時你就會記得我依家同你講嘅說話，你就會慨嘆點解唔早啲乖乖哋聽話。
病向淺中醫啦唔該。
～～
一個月前好友嚟香港玩。佢做孝順女，帶埋阿爸阿媽過嚟。佢帶咗大包裝嘅四款薯片俾我試味。原來一直都唔記得Post。話咁快聽日佢就要飛啦，一路順風！快啲返嚟再探我！
Search